Mahal Kita (07)

by: Daredevil

Nasa room na kami ni Lalaine na nakaupo habang naghihintay ng susunod na subject nang magsidatingan ang mga kaklase namin lalaki. Naisip kong pagtitripan na naman nila ako kaya hinanda ko na ang aking sarili.

Tama nga ang naging hinala ko. Lumapit sa tapat ko si Tom. Tumingala ako para tignan siya habang nag-iisip ng mga sasabihing salita kung sakaling kukutyain na naman niya ako. Ngunit di ako makapaniwala sa sunod niyang ginawa. Kinuha niya ang kamay ko, nilagay sa kanyang harapan at pinahimas ang kanyang ari. Agad ko namang inalis ang aking kamay.

"Malaki ba, ito yung tipo mo di ba bakla?" ang sabi niya sa akin.

Halong pagkabigla at pagkahiya ang naramdaman ko ng mga oras na iyon. At lalong itong tumindi nang magsitawanan ang iba na naming kaklase doon.

"Nagustuhan niya yan tol, tignan mo naman ang tahimik niya" si Richard naman na lumapit na rin sa amin.

"Hoy sumosobra na kayo tigilan niyo na nga siya mga wala kayong magawa!" ang biglang pagsabat ni Lalaine. Tinabihan niya ako.

"Oh bakit ikaw ang nagtatanggol sa kanya nasaan ba ang syota niya ha" tanong ni Tom.

Inakbayan siya ni Richard. "Ano ka ba pare e di kasama ang nag-iisang dyosa ng ating section?"

"Tignan mo nga naman ang pagkakataon, sigurado akong heartbroken ngayon ang bakla dito" si Tom ulit. Nilapit niya ang mukha sa akin. "Ayos pala ang jowa mo may pagkachickboy."

Bigla naman siyang tinulak ni Lalaine. Ano ba Tom, nananahimik na yung tao eh?"

"Aba oo nga pero kanina kung makasagot parang kaya na niya kami"

Sasagot pa sana si Lalaine nang biglang pumasok ang aming guro. Agad din silang nagbalikan sa kani-kanilang mga upuan. Napansin ko namang wala pa sina Trisha at Tonton.

Isang minuto pa ang nakakalipas habang nagsusulat ng lecture sa history ang aming guro, biglang dating ang grupo ng mga kababaihan kasama na si Tonton.

"Good afternoon mam, sorry were late" ang may paggalang na pagbati ni Trisha.

"Ok, you may now take your sits." ang sagot ng aming guro.

Pagkaupo ni Tonton, "Josh bakit di ka nagrereply sa mga text ko." Binilhan din kasi siya ng mga magulang ko ng isang basic nokia phone.

Agad ko namang tinignan ang mga text niya. Naka apat text siya sa akin. Pero hindi ko pa ito binasa dahil oras ng klase.

"Huwag ka munang magsalita baka makita tayo ni mam" ang sagot ko na lang sa kanya. Pero sa loob ko, gusto kong sabihin sa kanya na bakit mo pa ako inaalala eh kasama mo naman si Trisha"

______

Makalipas ang halos tatlong oras ay natapos na ang klase. Nauna nang lumabas ang grupo nina Tom, alam ko namang nagmamadali ang mga iyon na maglaro ng DOTA. Pasalamat na lang ako at hindi na nila ako pinagtripan. Lumabas na rin si Lalaine dahil may bibilhin pa raw siya sa mall. Ngunit si Trisha ay naroon pa rin sa loob, hinihintay siguro si Tonton. At di nga ako nagkamali, nilapitan siya nito na kasalukuyang naghihintay sa akin.

"Ton, saan ka ba umuuwi?" ang tanong niya sa kanya. Katulad kanina ay parang wala na naman siyang nakikitang kasama niya. Alam ko na sinasadya niya ito.

"Actually, nakatira kami ng nanay sa isang paupahang bahay ng pamilya ni Josh."

"Ah good. Pwede pala tayong magsabay sa pag-uwi." ang medyo masaya niyang pahayag.

"Naku sorry Trisha, sabay kami ni Josh umuwi. Nakamotor kasi kami"

Napansin ko naman ang pagkadismaya sa mukha ni Trisha na medyo ikinatuwa ko naman ng kaunti.

______

"Ano na Josh sagutin mo na yung tanong ko. Bakit di ka nagrereply sa mga text ko sa iyo?" ang tanong niya sa akin habang nagmamaneho. Hanggang ngayon pala ay hindi pa niya nalilimutan iyon.

"Hindi ko lang alam na may nagtext sa akin. Naka silent mode kasi phone ko"

"Talaga?" ang sabi niya na parang hindi kumbinsido sa sagot ko.

"Oo."

Pero sa isip-isip ko "Nakukuha mo pang mag-alala sa akin ha kahit pa busy kayo sa paglalabingan ni Trisha."

Wala na siyang sunod na tinanong sa akin hanggang sa makarating kami sa amin. Pagkahinto ng motor ay dali-daling kong binigay sa kanya ang helmet at pumasok ng bahay.

Matapos kong magbihis ng pambahay ay saka ko naalalang basahin ang mga text sa akin ni Tonton.

"Josh san ka?"

"Ui reply ka naman oh"

"Yaw mo reply, geh ganito na lang pag inasar ka ulit ng mga classm8 ntin text mo na lang me"

"Ingatz ka" ang huli niyang text na may smiley face.

Medyo nakaramdam naman ako ng kilig sa mga text niyang iyon dahil mayroon pala siyang pagmamalasakit sa akin. Ngunit sa kabilang banda ay naisip kong hanggang doon na lang talaga ang turing niya sa akin. Isang kaibigang tagabantay at tagagabay. Masakit man pero gaya nga ng payo ni Lalaine, dapat tanggapin ko ito.

Matapos kong magmeryenda ay nagpasiya akong buksan na ang aking laptop at maglaro ng paborito kong online game tutal ay wala naman kaming assignment sa araw na iyon. 

Halos isang oras na akong busy sa paglalaro nang may narinig akong pagkatok sa pintuan. Sinabi ko na lang na pumasok siya sa pag-aakalang si Aling Myrna ang taong iyon ngunit si Tonton pala.

"Ano ginagawa mo dito may problema ka ba?" ang tanong kong hindi nakatingin sa kanya. Nakapokus pa rin ako sa aking ginagawa.

"Gusto sana kitang yayaing mamasyal tutal wala naman tayong assignment ngayon saka gusto ko rin makapaglibang" si Tonton.

Sa sinabi niyang iyon ay napatingin ako sa kanya. Seryoso ang kanyang mukhang nakatingin sa akin. Hindi ko inaasahang magyayaya siya ng ganoon.

"Busy ako eh saka may pasok pa bukas. Sa weekend na lang" ang sagot ko sa kanya.

Biglang naman siyang natuwa, marahil sa sagot ko. "Sure yan Josh ah, promise mo yan sa akin tatandaan ko yan" si Tonton na may tonong pagtitiyak.

Tumango na lang ako at nginitian siya. Pumayag na rin ako, parang sukli ko na rin ito sa pagmamalasakit sa kanyang mga text sa akin.

Lumipas pa ang tatlong araw, ganoon pa rin kami ni Tonton. Ganoon pa rin ang mga kaklase ko sa akin pero sa pagkakataong iyon ay medyo napagtatanggol ko na ang aking sarili. Ngunit sa mga panahong iyon, napapansin namin ang madalas na pag-uusap ng dalawa lalo na kapag wala ang teacher o breaktime.

Pakiramdam ko sa aking sarili na habang nagtatagal ay tumitindi ang sakit ng aking damdamin. Sa nakikita ko na lalong silang nagiging close sa isat-isa. Nahahalata naman ito ni Lalaine kaya paulit-ilit niyang pinaaalala sa akin ang kanyang mga pinayo.

Biyernes na nang hapon, naglalakad na kami ni Tonton papuntang parking lot nang biglang habulin siya ni Trisha.

"Ton wait!" ang narinig kong sigaw niya sa di kalayuan. Huminto kami sa paglalakad.

Nang makalapit siya, "Ton I just want to invite you sa aming bahay bukas para makapaglunch kasama ng iba pa nating classmates. Kakarating lang kasi ni Dad galing US so naghanda si Mom ng kaunting salu-salo. Gusto ka rin nila makilala"

Sa imbitasyon na iyon ni Trisha, naalala kong din . nakaplano pala kaming mamasyal ni Tonton bukas. Kaya hinintay ko ang magiging sagot niya.

Tumingin muna siya sa akin at pagkatapos kay Trisha. "Sige no problem." ang sagot niya na nakangiti.

"Ok thanks so dito ka na lang sa school mag-abang. Sabay-sabay tayo ng friends kong pupunta doon"

Kung gaano kasaya si Trisha ay siyang kabaliktaran ng nararamdaman ko. Sobrang malungkot at dismayado ako. Marahil ay nakalimutan na niya ang aming usapan. Nagsisi nga ako dapat hindi na lang ako pumayag sa pagimbita niya kung di pala niya ito tutuparin.

"Sige kita-kits na lang bukas" ang magiliw na sagot ni Tonton.

Matapos noon ay nagpatuloy kami sa paglalakad.

Sa motor habang nakasakay, namamayani ang katahimikan sa aming dalawa. Ayaw kong magsalita dahil nga sa nararamdaman ko. Ewan ko lang sa kanya kung ano ang iniisip niya.

Ilang minuto pa ito tumagal hanggang sa siya na ang bumasag nito marahil hindi na nakatiis. "Josh ang tahimik mo diyan naninibago naman ako sa iyo"

"Ayos lang ako, pwede ba magconcentrate ka na lang sa pagmamaneho."

"Akala ko ba ok na tayong dalawa, bakit parang nagsusungit ka na naman sa akin?"

"Di ba ganito naman talaga ako buhat pa ng dumating kayo sa pamilya namin."

"Ok" napansin ko na may lungkot sa kanyang pagsagot. Ewan ko baka ako lang ang nag-iisip nun.

Itutuloy. . . . . . . . . .

allaboutboyslove.blogspot.com